Simón asegura que se fixo "lo meyor que se pudo" cola información disponible na pandemia

Xornada '5 años dempués: memoria, aprendizaxe y futuru de la COVID-19'

Fai güei cinco años, ante la emerxencia sanitaria xenerada pol coronavirus, el Conseyu de Ministros decretó l'estáu d'alarma, que paralizó'l país tres meses.

Fernando Simón, el que fuera cara visible de la xestión de la pandemia caltuvo una conversación cola ministra de Sanidá, Mónica García. Pa Simón, na xestión de la pandemia "fíxose lo meyor que se pudo" cola información disponible nesi momentu, anque, asume, pudo faese meyor.

Agora tamos más preparaos p’abordar una pandemia. Ye la enseñanza que la COVID-19 dexa pal futuru. En 2020, pa Fernando Simón, fíxose lo correcto anque pudo faese meyor.

Fernando Simón foi la cara de la xestión de la COVID-19, enfrentándose a crítiques. A pesar d'elles nunca pensó en dimitir. La pandemia espertó una fola de solidaridá con una reacción, que considera, fixo crecer el negacionismu. Simón apuesta pol criteriu científicu.

La próxima Axencia de Salú Pública va ser unu de los preseos que va faer qu'España tea más preparada ante una pandemia.

Si tuviera en funcionamientu en 2020, la pandemia tendría quiciabes "marxinalmente un impactu menor", pero sí habría "una diferencia mui importante", y ye que "nun tendríemos agora tantos profesionales de salú pública quemaos, saturaos y aforfugaos" y supunxera una dotación de "recursos meyor formaos" que torgaríen el sobreesfuerzu que se tuvo que faer entós.